هاد السؤال صراحة تكرر عندي بزاف أو قررت نجاوب عليه فبوصط باش كلشي إيستافد 

– أول حاجة خاصنا نعرفو الفرق بين شخص ذاتي (يعني السجل التجاري) وشخص معنوي (يعني شركة)

– الشخص الذاتي عبارة عن شخص كايكون داير شي نشاط تجاري وكايكون مسجل فالسجل التجاري بالبطاقة الوطنية ديالو يعني هو كشخص بالاسم ديالو شخصيا بمعنى أن الممتلكات ديالو بصفة عامة سواء مهنية أو شخصية كاتكون شيئ واحد وداخلة فالنشاط التجاري نتاعه 

– أما بالنسبة للشخص معنوي و لي كانعني بيها على سبيل المثال شركة ذات المسؤولية المحدودة (S.A.R.L) بحيث كاين فرق بين المال ديال الشركة و المال والممتلكات ديال مؤسس الشركة وفي حالة وقوع شي مشكل كعدم الوفاء بسداد الديون وكان أمر بسيزي، فالقانون عندو الحق يسيزي ممتلكات الشركة فقط وبالتالي الدولة معندهاش الحق تتدخل فممتلكات الشركاء 

“و لكن دير فبالك إلى ثبت خطأ جسيم أو التلاعب بأموال الشركة كايقدرو يتدخلو فممتلكات المسير حتا هو “

– باختصار راه الشركة إلا خدات كريدي و ماتخلصش فالأخير الدولة كاتابع الشركة إلا في حالة لا كنتي نتا لي ضمنتي الشركة و بالنسبة للسجل التجاري (شخص ذاتي) إلا خديتي الكريدي فنفس الشيء إلا ماتخلصش فالأخير الدولة كاتابعك نتا ولا نتي شخصيا

أنا شخصيا كا نفضل ندير شركة باش المسؤولية و الممتلكات تكون مفصولة أو ماشي مشكل أ سيدي نخلص شوية ديال الضريبة زايدة حيت فاللخر غادي تكون مرتاح من هاد الجنب أو هادشي لي كانصح بيه الأغلبية ديال الكليان