أي شخص كايزاول نشاط مهني أو تجاري أو صناعي أو خدماتي بشكل قانون في المغرب لا بد أنه يكون مسجل فالرسم المهني “La taxe professionnelle” 

بمعنى هاذ الرسم المهني كايكون خاصة بالأشخاص المهنيين فقط، سواء كانو عبارة على شركات، أو أشخاص ذاتيين، أو المقاولين ذاتيين… 

طريقة التسجيل فالرسم المهني كاتكون مختالفة على حسب النشاط المهني، وكذلك نوع الصفة القانونية ديالك “واش شركة أو شخص ذاتي أو مقاول ذاتي…”، لذلك من الأحسن تكليف محاسب بمهمة التسجيل 

نجيو دبا لطريقة حساب هاد الضريبة 

– أولا بالنسبة للشركات الجديدة كايكونو معفيين من هاذ الضريبة لمدة خمس سنوات الأولى “ما عدى شركات التأمين، وبنك المغرب غير معفين” 

– طريقة الحساب كاتكون ساهلة فقط كاناخدو القيمة الكرائية السنوية ديال المحل لكتزاول فيه النشاط مضروبة فواحد النسبة مئوية 

• القيمة الكرائية هي مجموع مبلغ الكراء السنوي، إذا كنت كاري أو كان عندك ملكية خاصة أو رهن او عقد إستغلال محل راه إدارة الضرائب هي لي كاتحدد بشحال ممكن يتكرى ذاك المحل لي داير فيه النشاط التجاري وعلى هاذ الأساس كاتحسبلك القيمة الكرائية 

• بخصوص النسبة المئوية تنقسم ل 3 ديال النسب :

Classe 3- 10%
Classe 2- 20%
Classe 1- 30%

إختلاف النسب المئوية كايكون على حسب النشاط التجاري لي داير،، إلا بغيت تعرف أكتر بخصوص هاذ الموضوع خاصك تراجع القانون 47.06 فيه كاين تقسيم للمهن على حساب لكلاس 

– مثال : إذا كنت كاري شي محل بثمن 1500 درهم فالشهر، وكنت كاتزاول شي نشاط تجاري لي جاي ف :

Classe 2- 20%

الضريبة المهنية فهاد الحال غادي تساوي :

(1500 x 12Mois x 20%) = 3600 dh

– أقل شي ممكن تخلص فالمجال الحضري والقروي كايختلف على حسب لكلاس لي جاي فيه نشاط نتاعك : 

CU : مجال حضري
CR : مجال قروي

Classe 3- 10% : CU-300 dh. CR-100 dh
Classe 2- 20% : CU-600 dh. CR-200 dh
Classe 1- 30% : CU-1200 dh. CR-400 dh

– باش تخلص هاذ الضريبة كاتمشي للمديرية العامة للضرائب وتخلص، وحاليا ادارة الضرائب كاتصاوب بلاتفورم جديدة باش تخلص هاذ الضريبة غير بالبطاقة البنكية. 

خلاصة القول هاذ الرسم المهني كايعتبر العتبة الأولى من أجل إتخاذ الصفة القانونية للشركة،، بعدها كاتجي العتبة الثانية لي هي التسجل في السجل التجاري 

شكرا على المتابعة و نتمنى يكون الشرح مفهوم 
ومرحبا بالأسئلة ديالكم