أجي تفهم #PLAN_COMPTABLE_MAROCAIN

في هذه الفقرة سنحاول شرح هذا الكتاب الأحمر الغني عن التعريف، وسيكون هذا الشرح موجه خصيصاً للمبتدئين والمتدربين والطلبة…

مقدمة

》شنو هو Plan comptable ؟ 

عبارة عن كتاب صغير الحجم كبير المحتوى فيه نجد أسماء وأرقام حسابات خاصة بجميع العمليات الحسابية التي تقوم بها الشركة

بعبارة أخرى، هاد لكتاب كالقاو فيه الأسماء ديال أي حاجة ممكن تشريها أو تبيعها الشركة، وكلقاو فيه الأسماء ديال جميع العمليات المالية بحال الديون، الأجور،… المهم أي عملية دارتها الشركة خاص المحاسب يجبدلها إسم من هاد لكتاب، وهاد الإسم كايكون مرقم بواحد الأرقام لي كاتسهل رقمنة المحاسبة.

》كيفاش المحاسب كايخدم بهاد لكتاب ؟ 

قبل مانعرفو كيفاش كانخدمو بهاد لكتاب خاصنا نعرفو أنه أي عملية دارتها الشركة كاندوزوها فجوج ديال أسماء الحسابات،

مثلاً شركة تجارية شرات سلعة وخلصاتها بالبنك،، في المحاسبة مغاديش ندوزو غير Achat de marchandises ونوقفو، خاصنا نكتبو حتى باش شرينا السلعة فهاد المثال غادي نكتبو حتى Banque

باش تفهم هاد تويشية مزيان قلب على 
Principe de la partie double

نجيو دبال للمفيد كيفاش المحاسب كايخدم بهاد لكتاب،،

فاش الشركة كاتشري شي سلعة وتجيب للمحاسب الفاتورة،

المحاسب كايشد ديك الفاتورة ويشوف شنو شرات الشركة، وكايفتح Plan comptable ويجبد منه الإسم ورقم الحساب لي عندنا فهاد لكتاب،،

لنفترض أن الشركة شرات حاسوب وخلصاته نقدا… فهاد الحالة المحاسب كايفتح Plan comptable كايمشي Classe 2 ويقلب على Matériel informatique لي رقم حسابها هو 2355 ويكتب فهاد الحساب مبلغ الحاسوب لي شرات الشركة

وكذلك كايمشي ل Classe 5 ويقلب على واحد الحساب سميتو Caisse ورقم حسابه هو 5161 ويحيد منه المبلغ باش شرينا الحاسوب حيت خلصناه نقداً يعني ب la caisse

وهكدا المحاسب كايجبد الأسماء وأرقام حسابات ديال جميع العمليات الحسابية لي كادير الشركة.

》علاش أصلاً دايرين هاد لكتاب ؟ 

هاد لكتاب ممكن نقولو أنه كايوحّد المحاسبة في المملكة المغربية، لولاه لقام كل محاسب بتسميه الأشياء حسب هواه، وهدا هو الدور الأساسي ديال هاد الكتاب الصغير وكذلك له دور هام في تسهيل رقمنة المحاسبة وتطويرها…

》خلاصة

بصفة عامة هدا الكتاب يعتبر الخطوة الأولى والأهم لدخول عالم المحاسبة، حيت فيه أسماء وأرقام حسابات ديال جميع العمليات المالية لي كادير الشركة

لذلك باش نعرفو الإسم وأشمن Compte غادي نخدمو بيه خاص نشوفو شنو مكتوب فالفاتورة أو La pièce justificative لي جابلنا صاحب الشركة،، لأنه كل فاتورة عندها إسم ورقم حساب فهاد الكتاب، الفاتورة ديال الحاسوب عندها إسم ورقم حساب، الفاتورة ديال الهاتف عندها إسم ورقم حساب…

وقس على ذلك في جميع العمليات، إن شاء الله غادي نشرحو أهم Les comptes لي كانستخدمو بكثرة في الشروحات القادمة, فقط نرجوا منكم تبارطاجيو هاد الشروحات باش كلشي يستافد 

#OUJDA_CONSULTING 
www.oujda-consulting.com