CAPITAL SOCIAL SARL 

1 : تعريف 

– رأس المال هو مجموع المساهمات لي كايساهمو بيها الشركاء من أجل تأسيس الشركة ديالهم SARL

– ممكن يكون رأس المال عبارة عن مبلغ من المال أو تجهيزات أو مباني…

– عدد الشركاء في الشركة الواحدة ممكن يكون مساهم واحد أو عدة شركاء كأقصى حد 50 شريك

2 : الحد الأذنى لرأس المال 

– مكانش حد أذنى من رأس المال ممكن تساهم بأي مبلغ بغيت، ولكن فالغالب يتم المساهمة بمبلغ 10.000 درهم كحد أدنى، ممكن دير أقل من هاذ المبلغ، وكذلك ممكن تساهم بأكثر من هاد المبلغ في حدود 100.000 درهم

– إذا أردت أن تأسس شركة SARL ذات رأس مال أكبر من 100.000 درهم الدولة كاتفرض عليك تبلوكي الربع من قيمة رأس المال في الحساب البنكي الخاص بالشركة وذلك في مدة التأسيس فقط من بعد ممكن تحيد لبلوكاج.

– يمكلك كذلك التغيير من رأس المال إذا كانت الشركة قديمة وذلك بالزيادة أو النقصان منه، هاد التغيير كايقوم بيه المحاسب حيت خاصك تقوم بعدة مراحل من بينها تغيير النظام الأساسي وعمل محضر الجمع العام الإستثنائي وتسجيل العقود والقيام بإشعار جميع الإدارات المرتبطة بنشاطك التجاري “إدارة الضرائب، المحكمة التجارية، صندوق الضمان الإجتماعي…” والعديد من المراحل لي خاصها محاسب ضاروري

3 – السؤال المتداول بكثرة، فوقاش خاصني نزيد أو نقص من رأس المال؟؟ 

لا يوجد أي قانون كايفرض علينا نزيدو أو نقصو من رأس المال، ولكن كاين بعض المعايير لي تعاونا باش نعرفو قيمة رأس المال لي خاصنا نبداو بيه وكذلك فوقاش خاصنا نزيدو أو نقصو منه، منها :

– أنت كمساهم في شركة غادي تكون مسؤول عن رأس مال الشركة ديالك فقط، بمعنى إذا جاتك متابعة أو حجز بسبب عدم سداد دين أو ضريبة… الدولة من حقها تحاسبك على رأس المال، إما أنك تجيبلهم الفاتورات لي صرفت فيهم رأس المال أو أنه يكون عندك فلوس 

“بمعنى آخر رأس المال خاصك دير فيه داك المبلغ لي ممكن تخسره فعلياً إذا قدر الله وقع شي مشكل”

– يمكن القول أن رأس مال الشركة يعكس حجمها، إذا كان رأس المال كبير معناتها أن الشركة كبيرة وخدامة وإذا كان صغيير معناتها أن الشركة صغيرة 

“بمعنى آخر، رأس المال بمثابة الصورة ديال الشركة، إذا كان كبير راه الشركة عندها صورة إيجابية تجاه المؤسسات والأبناك والمنافسين… والعكس صحيح”

– كذلك يمكن إعتبار رقم المعاملات والأرباح السنوية من المعايير لي تخلينا نتاخدو قرار يا أما بالزيادة أو النقصان 

“بمعنى آخر إذا كانت الشركة عندها رأس مال 10.000 درهم وحققت أرباح سنوية قيمتها 5.000.000 درهم في هذه الحالة يستحب من المساهمين الزيادة في رأس المال”.