فاش تبغي دير شي بيعا وشريا فالمحل ديالك أول حاجة خصك تفكر فيها هو السجل التجاري RC .. 

الى كانت الحالة ضعيفة دوسي ساهل جمعو راسك غادي يتقام عليك بشي 1000 درهم إلى حسبنا حتى مصاريف التنقل بين الإدارات.

كاين زوج نواع ديال السجل التجاري:

1 – الأشخاص الطبيعيين لي هوما تجار و صنايعية و منعشين عقاريين و نقل البضائع …..

2 – الأشخاص المعنويين لي هوما الشركات بالأنواع ديالها و فالغالب شركة ذات مسؤولية محدودة SARL لحقاش ماتحتاجش Capital كبير.

نتا حيت حالتك على قد الحال دير شخص طبيعي بلا ما دير شركة لاحقاش غالية شويا و صعيبة باش تجمع دوسي ديالها بحدك خاصها محاسب ضاروري

بالنسبة لأشخاص الطبيعيين (les personnes physiques ) خاصك تقلب على محل و دير عقد الكراء أو الا كان عندك محل راه كنز،،،

المهم خود عقد الملكية أو الكراء و گاليزيه و سجلو فدار الضريبة ب 200 درهم زائد 20 درهم على كل صفحة زائدة،،

ومنبعد تاخد من دار الضريبة مطبوعات تعمرهم بالمعلومات ديالك وتزيد عليهم عقد الكراء أو الملكية وفوطوكوبي من بطاقة الوطنية مصادق عليها ودفعهم فإدارة الضرائب

من بعد يومين أو أكثر رجع عندهم يعطيوك واحد الشهادة سميتها
Attestation d’inscription a la taxe professionnel (La patente)

دابا عندك :

عقد الكراء وla patente غادي ديرهوم فشوميز و تمشي عند كاتب عمومي يكون مطرق قولو عمرلي les imprimés ديال السجل التجاري يعطيك 3 ديال نماذج وقّع فيهم و ديهم لمقاطعة گاليزيهم.

حتى لدابا مزيان عندك : la patente + عقد الكراء +les imprimés + زوجنسخ من البطاقة الوطنية مصادق عليها.

دابا خاصك تشد موعد فالمحكمة التجارية لي فمدينتك، من بعد سير للمحكمة التجارية أو قسم السجل التجاري فالمحكمة الابتدائية و خلص 150 درهم فالصندوق و دفع الدوسي فقسم السجل التجاري وستنى يومين أو أكثر و ها نتَ عندك registre de commerce .

الله يوفق الجميع