الجواب على أهم الأسئلة لي كاتوصلنا على الخاص 

》عندي مبلغ ديال المال وبغيت ندير مشروع باش تنصحني؟؟

الجواب : نصيحة ديالي ليك هي أنك تستثمر فراسك، شوف شي مجال كاتبغيه قرا عليه مزيااان وخود خبرة كافية فيه ديك ساعة عاد بدا دير المشروع ديالك، حيت كاين بزاف ديال المشاريع لي ممكن تحقق بيها أرباح، فقط خاص صاحب المشروع يكون راسه عامر ومتمكن من المشروع دياله، أما إلا كان راسك خاوي راه وخا يعطيولك الذهب راك غادي تبعه بالخسارة 

》بغيت نتعلم المحاسبة، منين نبدا ؟؟

الجواب : أولاً غادي تبدا بواحد المادة سميتها “Comptabilité général” مين تكملها خاصك دوز ل “Fiscalité” ومن بعد دوز ل “Analyse financiare” إذا كملت هاد المواد كاتكون يالاه تعلمت الأساسيات ديال المحاسبة من بعد خاصك دير شي دورة تدريبية أو سطاج يكون فيه على الأقل سنة باش تشوف جميع المراحل المحاسباتية لي كادوز على الشركات طوال السنة… 

》واش ضروري خاصني مكتب محاسب معتمد باش نفتح شركة ؟

الجواب : لا، ممكن تفتح شركة عند مكاتب التوطين والإستشارات بثمن مناسب، وممكن كذلك تفتحها راسك إذا كانت عندك الخبرة الكافية في مجال المحاسبة. 

》باغي نعرف شحال تقام عليا شركة جديدة SARL ؟

من الصعب تحديد مصاريف تأسيس الشركة والمحاسبة حيت كاتختلف، ولكن بالتقريب الأسعار كاتكون كالتالي : 

– مصاريف تأسيس الشركات SARL تتراوح بين 3.500 درهم حتى ل 10.000 درهم وذلك حسب نشاط الشركة، وكذلك واش عندك عقد كراء ولا غادي دير التوطين، ورأس المال كذلك إلا كان أكثر من 100.000 درهم خاصك تخلص عليه مصاريف التسجيل…

– كذلك مصاريف المحاسبة تختلف وذلك حسب إختلاف رقم المعاملات والخدمات المقدمة على كل حال أقل شيئ ممكن تخلص بيه المحاسبة هو 2.000 درهم فالسنة،

– بالنسبة للضرائب كاتكون معفي لمدة 5 سنوات الأولى من الضريبة المهنية، وكاتكون معفي كذلك لمدة 3 سنوات الأولى من الحد الأذنى للضريبة وذلك في حال كانت النتيجة السنوية خسارة، إلى كنت رابح وخا غير درهم راك غادي تخلص الحد الأدنى من الضريبة لي هو 3.000 درهم

》واش ضاروري نحط دوصي ديال الشركة ديالي عند مكتب محاسب معتمد ؟

الجواب : لا، ممكن دير شخص يتكلفلك بخدمات مساعد محاسب ونتا بقا دوز الإقرارات الضريبية ديالك إلا كنت كاتعرف، إلا ماعرفتش ممكن دير دورات تدريبية باش تعلم، في حال مابغيتش دير مساعد محاسب ومابغيتش تعلّم ديك الساعة عاد غادي يخصك ضاروري تحط دوصيك عند محاسب معتمد. 

#OUJDA_CONSULTING